阿爸个店

by 謝可為

客家人多數係做細生理過生活。涯爸也開一間零拆店賣各式各用家用品。涯記得汝愛買麼个都有。裏係涯做細伙个記憶。涯爸講佢後生時佮人食工去鄉下招布。過了留兜多少鐳加涯婆个錢筒就試開糖果店。開無多久遇著幫戛大火災就燒周周。後來毋知樣般型會有翻開新店。涯在肚子肚就在店肚裏了。涯姆交著涯爸每日都在店肚抮手佢。涯兜第一个店在新巴析个。盡老个店。棚頂有山口洋人開个相店。前面有一枝樹、樹下有人開咖啡店。涯常時在裏咖啡店遼。咖啡店个阿叔教涯折子、涯曉折獅頭、麒麟、𧊅子。店後尾有草坪、草坪走過去有涯阿姑開雜飯店。涯爸最肯打涯來裏食麵食雞飯。涯也在裏飯店學曉用筷子。涯最記得个朋友係阿勇、老鼠明該兜。常店頭个賭相囥賭相追。

過幾年新巴析愛重做過。店頭就暫時徙(sai)去PONDOK近GEDUNGPANCASILA嗯析。涯毋知自家在裏做多久。後來新巴析做好時涯兜就搬落新店。裏店時慶喔。有雙棧棚頂用兩隻間肚一隻廳。還有一隻吊棚。涯爸也買雙棧床放在二樓。涯正睡幾輪係有跈涯爸店肚歇夜時。涯爸就睡在吊棚。毋就店个貨緊落緊多來睡目个地方都無。涯也無跈阿爸去店肚歇夜了。往時个店一年三百六十五汝都開卻過唐人年正放一隻禮拜。涯爸年初三就開半門開去做生理。哎呀屋家坐著也無擱煞。

涯在店个生活就到涯高中畢業。畢業後涯離開邦戛去椰城讀書了。後來風風浪浪涯爸个店也在埠頭心重開。涯爸涯姆棚頂歇。三棧做「孤榔GUDANG」囤貨。涯有轉去幾輪。最後轉就帶涯今下个老婆去分涯爸涯姆看。恁興著佢兩人也無反對。涯正會交著裏隻日本妹。

涯爸認為年老了三年前發病無人曉照顧。最後就關忒了無人曉接下去。今下涯心肚還係常常心焦店。盡想有一日涯曉像涯爸樣空手立家自家當頭家。毋知幾時正曉實現裏隻夢。但目前還係愛勤勤做工為涯家个家庭。淨博涯倈大來也曉接下去寫同名个文章、「阿爸个店」。

日本2016年11月20日